CERT-IS varar við SMS-vefveiðum sem eru sendar í nafni Póstsins. Um er að ræða svikaherferð þar sem einstaklingar fá SMS á íslensku sem virðast koma frá Póstinum. Textinn í skilaboðunum getur verið mismunandi en í þeim er reynt að fá fólk til að smella á hlekk sem leiðir inn á vefveiðisíðu sem ýmist líkir eftir greiðslugáttum eða innskráningarsíðu bankanna. Þar er síðan reynt að plata fólk til að slá inn viðkvæmar notendaupplýsingar, svo sem lykilorð eða greiðslukortaupplýsingar. Þessar upplýsingar eru síðan misnotaðar til að komast inn á netbanka viðkomandi eða framkvæma greiðslur með greiðslukortaupplýsingum.
