Hópur netöryggissérfræðinga frá Íslandi tók nýverið þátt í stærstu netöryggisæfingu heims, Skjaldborg 2026 (e. Locked Shields 2026), sem fram fór dagana 13.–24. apríl. Þetta var í fjórða sinn sem Ísland tekur þátt í æfingunni en rúmlega 4.000 þátttakendur frá 41 landi tóku þátt í æfingunni og skipuðu 16 fjölþjóðleg lið sem kepptu sín á milli.
Æfingin er haldin af netvarnarsetri Atlantshafsbandalagsins, NATO Cooperative Cyber Defence Centre of Excellence (CCDCOE) og tók Ísland þátt að þessu sinni með Noregi og Atlantshafsbandalaginu. Hópurinn í ár var skipaður 17 sérfræðingum frá tíu opinberum stofnunum og einkafyrirtækjum, þ.e. Reiknistofu bankanna, Íslandsbanka, Arion banka, Varist, Keystrike, Heilbrigðisstofnun Suðurnesja, Syndis, Heilbrigðisstofnun Austurlands og Seðlabanka Íslands, auk CERT-IS og varnarmálaskrifstofu utanríkisráðuneytisins.
Æfingin fer fram í stafrænu sýndarumhverfi sem líkir eftir raunverulegum aðstæðum. Þar vinna teymi saman að því að vernda skáldað ríki gegn flóknum og víðtækum netárásum sem beinast að upplýsingakerfum og mikilvægum innviðum, svo sem orkukerfum, veitukerfum og fjarskiptum. Jafnframt þurfa þátttakendur að sinna upplýsingamiðlun, bregðast við dreifingu villandi upplýsinga og leysa lagaleg álitaefni sem kunna að koma upp.
Æfingar sem þessar eru þýðingarmikill liður í að styrkja öryggi mikilvægra innviða sem og að stuðla að auknu alþjóðlegu samstarfi Íslands á þessu sviði, bæði innan Atlantshafsbandalagsins og í tvíhliða samstarfi, meðal annars við Noreg og önnur bandalags- og samstarfsríki.
„Þátttaka Íslands í Locked Shields skiptir sköpum fyrir uppbyggingu netvarnagetu landsins. Æfingin veitir íslenskum sérfræðingum einstakt tækifæri til að vinna þétt með erlendum kollegum undir álagi og læra af þeim bestu á alþjóðavettvangi, um leið og hún styrkir samstarf opinberra stofnana og innlendra fyrirtækja hér heima. Með þessu móti byggjum við upp sameiginlega þekkingu, traust og viðbragðsgetu sem er nauðsynleg til að verja mikilvæga innviði Íslands í síbreytilegu ógnarumhverfi,“ segir Magni R. Sigurðsson, forstöðumaður CERT-IS.
