Ísland tekur þátt í stofnun netöryggismiðstöðvar (e. cyberhub) sem miðar að því að efla greiningu, viðbrögð og varnir gegn netógnum, ásamt Noregi, Danmörku, Finnlandi, Eistlandi, Lettlandi og Litáen. Verkefnið er samfjármagnað af Evrópusambandinu í gegnum styrkjaáætlun Digital Europe með heildarfjárhagsramma upp á 14 milljónir evra. Um er að ræða Nordic Baltic Cyber Consortium (NBCC), en Samfélagsöryggisstofnun Danmerkur fer með umsjón verkefnisins með aðkomu CERT-IS fyrir hönd utanríkisráðuneytisins.
„Netárásir þekkja engin landamæri og eru hluti af þeirri öryggisáskorun sem samfélög standa frammi fyrir í dag. Þær geta haft alvarleg áhrif á þjóðaröryggi og mikilvæga innviði sem við reiðum okkur á í okkar daglega lífi. Á þeim víðsjárverðu tímum sem við lifum er því mikilvægt sem aldrei fyrr að samstíga ríki efli samstarf sitt enn frekar til að sporna gegn þessari vá sem sífellt færist í aukana,“ segir Þorgerður Katrín Gunnarsdóttir utanríkisráðherra. „Með þessu samstarfi við okkar helstu samstarfsríki byggjum við upp traust, deilum þekkingu og eflum viðbragð til að vernda samfélög okkar og tryggja sameiginlegt öryggi þeirra til framtíðar.“
Mikilvægur liðsauki fyrir alla sem koma að netöryggismálum
Þáttökuríkin hyggjast koma á fót sameiginlegum greiningarbúnaði og svæðisbundinni og gagnadeilingu til að nýta rauntímaupplýsingar til að koma í veg fyrir netárásir. Þá verður NBCC sömuleiðis vettvangur fyrir þróun nýrrar tækni, m.a. lausna sem byggja á gervigreind, og stuðla þannig að auknu samstarfi einkaaðila og vísindasamfélagsins.
Þar að auki kemur NBCC til með að styðja við stjórnvöld og tryggja samstarf þeirra á milli er lýtur að betri ástandsvitund og samhæfingu netöryggismála.
NBCC mun starfa sem svæðisbundin netöryggismiðstöð þvert á landamæri, sem þýðir að Atlantshafsbandalagið verður einnig virkur þátttakandi í víðtæku samstarfi innan Evrópusambandsins (ESB) um netöryggi, þ.e. við stofnanir ESB og aðrar svæðisbundnar netöryggismiðstöðvar.
