Netöryggisæfingin Cyber Coalition 2025 fór fram dagana 28. nóvember til 4. desember og tók Ísland þátt ásamt 35 aðildar- og samstarfsríkjum. Æfingin hefur verið haldin árlega frá árinu 2008 á vegum NATO og er markmið netöryggisæfingarinnar að efla samvinnu og viðbragðsgetu þjóða gegn net- og fjölþáttaógnum. Þetta var þriðja árið sem Ísland tekur þátt í æfingunni undir leiðsögn CERT-IS, en íslenski hópurinn var að þessu sinni skipaður af 13 opinberum stofnunum og einkafyrirtækjum; Orkuveitan, Landsnet, Isavia, Icelandair, Lögreglan á Suðurnesjum, Nova, Varnarmálasvið Landhelgisgæslunnar, Farice, Almannavarnadeild Ríkislögreglustjóra auk CERT-IS og Varnarmálaskrifstofu Utanríkisráðuneytisins.
Í ár tók Ísland tók þátt í þremur atburðarrásum þar sem sviðsettar voru netárásir og fjölþáttaógnir og viðbrögð við þeim æfð. Sviðsmyndirnar í ár fólu í sér meðal annars alvarlega netárás á orkuinnviði, drónaflug yfir Keflavíkurflugvelli ásamt slit á sæstreng og truflunum á fjarskiptum yfir gervihnetti. Á seinasta degi æfingarinnar var hluti þátttakenda kallaður saman á samhæfingarmiðstöð Almannavarna til að fara yfir viðbrögð við atvikunum.
Markmiðið með æfingunni var meðal annars að æfa samhæfingu, samskipti og sameiginlega ákvarðanatöku innanlands þegar mörg atvik koma upp á stuttum tíma og margþætt netvá stendur fyrir dyrum. Einnig var æfð tæknileg greining á netógnum í sýndarumhverfum sem þátttakendur fengu aðgang að.
Æfingin gekk vonum framar og fram kom að reynsla af viðbragði vegna náttúruvá hefur skilað sér til þátttakenda sem nýtist einnig í netvá. Sérstaða Íslands sem lítillar þjóðar er að boðleiðir eru stuttar sem kemur að verulegu gagni þegar um alvarleg atvik er að ræða.
Allir þátttakendur töldu að æfingin hefði skilað sér í bættu viðbragði og mæltu með þátttöku að ári. CERT-IS mun nýta niðurstöður æfingarinnar til að bæta ferla og gera næstu æfingu enn betri.
Þátttaka í Cyber Coalition er mikilvægur liður í að styrkja netvarnir á Íslandi og er hluti af netaðgerðaáætlun stjórnvalda. Æfingin er mikilvægur vettvangur til að efla samstarf opinberra aðila og einkageirans á sviði netöryggis og styrkir getu þeirra til að verja mikilvæga innviði á Íslandi. Hún styrkir einnig alþjóðlegt samstarf Íslands á þessu sviði, bæði á vettvangi Atlantshafsbandalagsins og annarra bandalags- og samstarfsríkja.