Alvarlegir veikleikar hjá Juniper Networks

Tilkynnt var um veikleika í Junos OS og Juniper Secure Analytics (JSA) hjá Juniper Networks þar sem tveir þeirra voru metnir sem alvarlegir (e. critical). CERT-IS mælir með að uppfært sé eins fljótt og auðið er í útgáfu þar sem veikleikarnir hafa verið lagfærðir.

Juniper Networks

Junos OS SRX og EX Series

Veikleikinn CVE-2024-21591 með CVSSv3 einkunn upp á 9.8 er veikleiki í J-Web sem nær til Junos OS SRX og EX Series. Um er að ræða galla sem leyfir skrif út fyrir minni (e. out-of-bounds write) sem gefur óauðkenndum ógnaraðila færi á að framkvæma álagsárás (e. DoS attack), keyrslu á kóða (e. remote code execution) og að öðlast hæstu réttindi (e. root privileges) á tækinu [1,2].

Juniper Secure Analytics (JSA) Series

Veikleikinn CVE-2023-50164 með CVSSv3 einkunn upp á 9.8 er galli í Apache Struts kóðasafni (e. library) sem Juniper Secure Analytics (JSA) er háð. Misnotkun á veikleikanum gerir ógnaraðila kleift að hlaða upp skrám á þjónustuna til þess að keyra kóða (e. remote code execution) [3].