CERT-IS heldur áfram að fylgjast með gangi mála tengdum þeim veikleikum sem varað var við 20. október og CERT-IS fjallaði ítarlega um 21. október. Hér kemur stutt samantekt á stöðunni eins og hún blasir við okkur í dag.
Hver er staðan
Cloudflare og Amazon hafa tilkynnt vöxt í tilraunum til að misnota veikleikann á sínum kerfum. Enn hafa ekki borist fréttir um innbrot í kjölfar misnotkunar á veikleikanum.
Veikleikarnir eru báðir þess eðlis að það er ekki auðvelt að búa til spillikóða sem virkar á öllum kerfum en búið er að staðfesta að sjálfgefnar uppsetningar margra kerfa (t.d. WordPress, Joomla, Drupal) er hægt að misnota en sérsníða þarf spillikóðann fyrir hvert kerfi fyrir sig.
Ekki hafa borist neinar fréttir um að uppfærslan sé að valda truflunum sem endurspeglar hve vel var unnið að því að sannreyna hana áður en hún var gefin út.
Hver eru næstu skref
CERT-IS mun halda áfram að fylgjast með framþróun málsins og verður með sérstaka vöktun í gangi á íslenskum vefsíðum og vefkerfum.
Við biðjum alla rekstraraðila tölvukerfa að fylgja eftir leiðbeiningum frá útgefendum PHP og sannreyna að þeir hafi sett inn viðeigandi öryggisuppfærslur á sínum kerfum eða fylgi leiðbeiningum um mildunaraðgerðir.
Viðeigandi upplýsingar frá PHP má finna hér: PHP: News Archive – 2026
Þeir aðilar sem reka eldri PHP útgáfu sem ekki fékk uppfærslu í gær er bent á að skoða samfélagsverkefni á borð við Sury sem bjóða gjarnan upp á uppfærslur fyrir eldri útgáfur. Sjá nánar hér: https://deb.sury.org/
Á vefnum php2shell.is er að finna nánari útskýringar um veikleikann ásamt leiðbeiningum og hefur vefurinn einnig prófunarhnapp sem getur gefið vísbendingu um hvort búið sé að uppfæra PHP sem er keyrandi á vefþjóni.
Verði aðilar varir við tilraunir til misnotkunar á veikleikunum má tilkynna slíkt til CERT-IS í gegnum www.cert.is eða í gegnum [email protected].